Nagsaka sa P100,000 ang reward money sa makatudlo kun sin-o ang may kahimuan sang krimen sa tatlo ka mag-utod sa Hacienda Badiang, Barangay E. Lopez sa Silay City sang Sabado.
Madamo man sang mga tawo ang nagpabutyag nga magabulig agud malubad ang krimen kag mahatagan sang hustisya ang kamatayon sang isa ka 9-anyos nga babaye kag pagkasamad sang iya 14-anyos nga magulang nga babaye kag ila 3 ka tuig nga manghod nga lalaki.
Suno sa panaysayon sang half-sister sang mga biktima, nadiskubrehan sang ila amay sa iya pag-abot sa ila balay nga pilason ang mga biktima sa sulod sang kwarto.
Nakaangkon ang mag-utod sang pilas sa ulo kag mga lagub sa lawas. Ginapatihan sila ang ginlampusan sang bato sa ulo kag ginkastigo.
Ginsiling ni Lt. Col. Edison Garcia, hepe sang Silay PNP, estable na ang kondisyon sang 3 ka tuig nga bata nga lalaki sa ospital kag siya ang maistorya na, samtang kritikal pa ang kondisyon sang 14-anyos nga babaye.
Nagalaum ang pulis nga magapadayon ang recovery sang duha ka mga survivor-victims bangud dako ang ila mangin papel sa paglubad sang krimen.
Si Negros Occidental Governor Eugenio Jose Lacson ang nagapangamuyo man nga makasurvive ang duha ka mga kabataan, madakpan kag mapasabat ang may kahimuan sang krimen.
Suno kay Lacson, may suspek na ang PNP, gani indi na kinahanglan pa nga magdugang ang probinsya sang reward.
Nagapati ang gobernador nga insakto na ang natipon nga reward kag ang mas importante karon amo nga mabuligan ang pamilya ilabi na ang iloy sang mga kabataan nga naga-obra sa Saudi Arabia kag karon nagpauli bangud sang natabo sa iya mga anak.
Magahatag ang panguluhan probinsyal sang financial assistance para sa pamilya sang mga biktima.
Nagtanyag si Negros Occidental 3rd District Representative Javi Benitez sang P50,000 nga padya, samtang P25,000 naman si Silay City Mayor Joedith Gallego, kag dugang nga P25,000 si anay Talisay City vice mayor Samuel Siote.
Padayon pa ang case build-up sa krimen kag tanan nga anggulo ang gina-usoy karon sang kapulisan.
Suno kay Garcia, wala pa mapat-ud kun gintuyo nga ginhimuslan ang 9-anyos nga babaye apang magapatigayon sang medical examination ang Crime Laboratory agud mahibaluan kun may natabo nga paghimulos ukon wala.*
[sibwp_form id=1]