Nagdangat sa masobra sa 15,000 ka mga pumuluyo sa Himamaylan City ang nag evacuate bangud sang nagluntad nga encounter sa tunga sang military kag rebeldeng NPA.
Suno kay Provincial Social Welfare and Development Officer, Merle Garcia, as of 9am sini nga adlaw, Oktubre 10, 3,543 ka pamilya ukon 15,024 ka pumuluyo halin sa Brgy Carabalan, Cabadiangan kag Brgy 3 ang apektado. May mga gin report man nga nag evacute sa mga mga apektado nga barangay sa Binalbagan pero suno kay Garcia ini ang gina account pa.
Suno kay Negros Occidental Governor Eugenio Jose Lacson, wala pa ang mga apektado nga pumuluyo nahatagan sang clearance sang military nga maka balik sa ila puluy-an, pero naga laum siya nga matigayon ini bangud samtang naga dugay sila sa evacuation center mas naga budlay man ang sitwasyon.
Suno kay Lacson may 14 ka evacuation centers sa karon para sa mga apektado. May nagakaigo mga relief assistance sa karon para sa ila suno kay Lacson.
Suno sa gobernador, isa ini sa mga lugar nga problemado kun armed conflict ang pagahambalan.
Nagapati man si Lacson nga sa karon ang komunidad ang naga bulig kag nagahatag na sang kooperasyon sa gobyerno.