Maga-arado kuntani sang kampo ang isa ka mamumugon sang nakapanimaho siya sang daw kaangay sa patay nga sapat sa bahin sang Hacienda Bernabe, Barangay Salvacion sa banwa sang Murcia, Negros Occidental, Miyerkules sang hapon, Hulyo 2.
Apang sang ila nakita ang bangkay, nagduda sila nga basi tawo ini, gani wala na sila nagpadayon sa pag-arado kag ginpakamaayo nga magkadto na lamang sa Murcia Police Station agud mag-report.
Sa pag-abot sang kapulisan, ila ginkumpirmar nga tawo gid man ang nagakaagnas nga bangkay nga natabunan sang duta.
Maligwin kag wala sang suga ang lugar kun sa diin nasapwan ang bangkay.
May kalayuon ini nga 20 metros gikan sa highway kag medyo masiot bangud mataas na ang mga tubo.
Wala pa mahibaluan kun lalaki ukon babaye ang bangkay bangud nagakaagnas na ini. Wala man sang may narekober nga mga pagkabutang nga maka-identify sa iya, magluwas nga ini ang nakasuksok lamang sang brief.
Ginsiling ni Police Major Sherwin Fernandez, hepe sang Murcia PNP, base sa inisyal nga examination sang SOCO, wala sang nakit-an nga pilas sa lawas sang biktima, apang may yara ini sang abrasions sa liog nga posible isa ka sinyales nga siya ang ginkuga.
Nag-request na ang kapulisan sang post mortem sa bangkay, nga yara karon sa puneraria.
Suno kay Fernandez, wala sila sang may nabaton nga report nga may na-missing sa Murcia kag as of press time, wala man sang himata nga nagpadulong sa funeral parlor agud i-identify ang biktima.