Liwat-liwat ang pagpilak sang basura sa mga lugar nga wala dapat gina bilinan sang basura suno sa kay Bacolod City Mayor Greg Gasataya.
Parehos na lamang sa Memorial Park sa Barangay Alijis, sa area sang Punta Taytay, kag sa iban pa nga mga lugar.
Bisan nga natinluan na ini sang International Solid Waste Integrated Management Specialist Inc. ukon ISWIMS pagkasunod nga adlaw gina bilinan na naman ini liwat sang basura.
Suno sa alkalde, iya ginmanduan ang City Legal Office nga maghimo sang tikang batuk sa illegal dumping sang basura.
Sa tion nga mag-normalize na ang koleksyon sang basura, kinahanglan nga may dakpanay sang mga violator kaupod ang mga barangay.
Dugang pa ni Gasataya nga nagatipon na sang mga dokumento ang CLO angut sa mga kaso sang illegal dumping, kag kinahanglan nga mapatuman ang Republic Act 9003 ukon ang Solid Waste Management Act, lakip na ang mga lokal nga ordinansa.
Ginahinyo sang alkalde ang suporta sang mga barangay sa pag-monitor sang mga lugar nga indi dapat paghabuyan sang basura agud mapunggan ang amo nga iligal nga aktibidad.*