Patay ang nagabusong nga nurse, pati na ang wala pa mabun-ag nga lapsag nga ginadala sini, matapos mabungguan kag malapakan sa national highway nga sakop sang Purok Proper North, Barangay Taloc sa syudad sang Bago, las 9:15 Domingo sang gab-i.
Nagatabok sa pedestrian lane si Maria Angela Buendia, 36-anyos, kuntani nga mag-duty sang night shift sa Valladolid District Hospital sang siya ang nabungguan sang Toyota Avanza nga nagapakadto norte nga bahin sang highway kag ginamaneho ni Philip Jansen Cantiller.
Bangud sang impact, nagtabog si Buendia sa pihak nga lane kag nalapakan sang nagapadulong sur nga Toyota Yaris, nga ginamaneho ni Salvador Castro.
Tungod sang pagkabunggo kag pagkalapak kay Buendia, naggwa sa iya tiyan ang anum ka bulan nga lapsag. Si Buendia kag ang iya lapsag ang pareho gin-deklarar nga dead on arrival sa Bago City Hospital.
Ginsiling ni Lt. Col. Ariel Pico, hepe sang Bago City PNP, ginahanda na nila ang mga dokumento sa pagpasaka sang kaso nga reckless imprudence resulting in multiple homicide sang bana ni Buendia batuk sa duha ka mga driver, nga nakahunong karon sa Bago police station.
May mga solar lights kag indi madulom ang 6-lane highway nga ginluntaran sang insidente, apang suno kay Pico, ila natalupangdan nga pareho dark-tinted ang duha ka imbulbado nga mga salakyan.
Pila man sa nakita nga kabudlayan sa area amo ang kalaparon sang dalan nga kinahanglan tabukan sang mga pedestrian kag ang mga salakyan nga wala nagahinay ukon nagadulog sa mga pedestrian lanes.
“Kay ina siya nga concern, kun maglabay ka da adlaw, may makita ka nga problema. Kung maglabay ka kung gab-i may makita ka man dira nga problema. Ina nga mga area malaba na siya nga street going to Bacolod. Kag ini siya indi man lang kinanglan nga sa PNP. This is a whole of government approach kay ti ang highway part man sang DPWH, may implementation of laws man, may ara man ulobrahon si barangay, may ara man si DILG”, suno kay Pico.