Wala pa sang nabaton nga notice ang local government sang Bacolod halin sa AstraZeneca Pharmaceuticals Philippines, incorporated angut sa balayran para sa kapin 650,000 doses sang Covid 19 vaccine.
Kapin sa 434,000 ang nag expire sa Department of Health Central office sa Manila.
Suno kay Dr. Carmela Gensoli, pamuno sang City Health office, may 20,000 doses sang bakuna ang na deliver sang Hulyo pero wala ini maubos antes pa nag expire.
Si Mayor Albee Benitez ang nangayo na sang bulig sa national government para ma settle ang balayran sa mga nag expire nga bakuna nga gin advance purchase sang Leonardia administration.
Suno kay Benitez ang mga nag expire nga bakuna ang mahimu mangin kabahin sang natalana nga Congressional Inquiry.
Samtang karon nga nagahilapit naman ang pagbalik sang face to face classes sa Agosto 22, mabaskog nga ginahaylo sang pamunuan sang CHO ang mga ginikanan nga pabakunahan na ang ila maga eskwela nga kabataan.
Prayoridad man sang Benitez administration ang kampanya kontra dengue kag ang paghatag solusyon sa posible pag gutok sang trapiko sa pagbukas sang mga pampubliko nga eskwelahan.