Nagluntad ang malawig nga power interruption sa banwa sang E.B.Magalona, pila ka bahin sang Manapla kag Victorias City humalin las-5:50 sang kaagahon sang kahapon.
Suno sa General Manager sang Northern Negros Electric Cooperative Inc. ukon NONECO nga si Engr. Wilbe Bilbao, matapos ang mabaskog nga ulan kag sang pag pangilat Lunes sang gab-i, gin-usisa nila ang Victorias sub-station kag wala nakapasar ang isa ka parameter sang transformer kag nahibaluan nga may damage ini.
Subong nga adlaw, naglab-ot na sa 80% ang power restoration sang supply sang kuryente sa Victorias suno kay Bilbao. Ini pinaagi sa load transfer of power halin sa banwa sang Manapla.
Sini nga hapon na amat-amat naman balik ang power supply sa mga parte sang EB Magalona proper. Ini pinaagi sa bulig sang Negros Power nga nag connect sang ila linya sa Silay distribution line.
Padayon sa gihapon ang ginahimo nga pagkaayo sang NONECO para mabalik sa normal ang power supply sa tatlo ka mga LGU.