Isa ka molasses spill nagluntad sa feeder port sang old Sagay sa Sagay City. Masobra isa ka ektariya sang baybayon ang apektado.
Ginkumpirma ni Roberto Togle ang Sagay Marine Reserver Resource Management Section Head, nga gikan sa isa ka barge nga halin sa Manila nga naka dock sa puerto ang molasses spill.
Nag karga ini sang molasses halin sa siudad kag nag leak ang molasses gikan sa chamber sang barge.
Dugang pa ni Togle, Lunes isa ka truck sang molasses ang gin load sa barge, Martes pito tubtob walo ka trucks sang molasses ang na karga kag didto nagluntad ang spill.
Kaina lang na nakit-an ang spill nga gina bulubanta nga nagsakop na sang halos 1.3 hectares.
Ginpauntat anay sang LGU ang pag-load sang molasses sa barge.
Sa subong gina tinghuaan nga ma contain anay ang molasses.
May mga divers na nga gin deploy sa area para makit-an kun diin ang leakage kag matukapan.
Wala pa man sang may gin-report nga fish kill sa area.
Sa Sagay makita ang Sagay Marine Reserve, ang pinaka malapad nga marine reserve sa Pilipinas nga naga lapad sang 32,000 hectares.
Suno kay Provincial Environment and Natural Resources Officer Joan Gerangaya, indi poisonous sa mga isda ang molasses kay gina gamit ini gani sa paghimo sang feeds sa isda pero ila na nga gina imbestigahan ang ini nga insidente.