Bangud sang malapad kag matawhay nga dalan kag mabugnaw nga klima, masami ginasaka sang mga turista ang Barangay Granada kag iban diri mga motorcycle riders.
Pero para mapabilin ang kalinong kag hilway sa noise pollution ang lugar hugot nga ginapatuman ang City Ordinance number 356 series of 1993 ukon ang ordinansa nga naga regulate sa noise pollution sa siudad pati na ang Republic Act 4136 ukon ang Modified Open Muffler Act of 2016.
Gani kaina ginpalapakan sa pison ang 280 tanan ka mga units sang magahod nga mga mufflers sang motorsiklo. Ginpamunuan ini ni Police Major Joery Puerto, hepe sang Police Station 5 sa Bacolod kag Punong Barangay Alfredo Talimodao Jr. Suno sa kay Major Puerto luyag nila ipalab-ot ang mensahe sa publiko nga indi pwede ang magahod nga mga tambutso sa area nga nasakupan nila kag sila ang naga himo sang tikang para makumpiska ang ini nga mga open pipe.