Dismayado ang katapo sang United Negros Drivers and Operators Center ukon UNDOC karon nga nagsugod na sa pagbyahe ang modernized jeepney nga may rota nga Eroreco-Central market sa Bacolod.
Sa Bacolod ginpatuman suno kay Diego Malacad, secretary general sang UNDOC, ang nahauna nga pagpatuman sang jeepney modernization program.
Amo nga nagalain man ang iya nga buot kun ngaa naduso ini pinaagi man sa natukod nga ordinansa sang siudad.
Lunes sang ginlunsar sang Land Transportation Franchising and Regulatory Board upod sa Land Transportation Office ang jeepney modernization program.
Suno sa pamunuan sang LTFRB may kutob na lamang sa abril 2022 ang mga tradisyunal nga passenger jeepney. Pero wala man nagakasayuran nga maga-untat na sila sa pagbyahe.
Ginklaro naman ni Councilor Dindo Ramos, chairperson sang committee on transportation nga desisyon sang national government ang pagpatuman sang jeepney modernization program kag nagasunod lamang sila sa memorandum sang Department of the Interior and Local Government.
Bagay nga suno kay Malacad, pwede pa ma desisyonan sang isa la local government unit kun ipatuman na ukon indi anay.
May kwarentay dos tanan ka mga panibag-o nga rota sa Bacolod ang natagaan sang approval para sa pagbyahe sang modernize jeepney.