Malapit sa tunga sa milyon ka pesos nga balor sang salakyan sang siudad nga gin-alegar ginkawat pabayran sa lima ka mga empleyado
Ginahulat pa sang City Legal Office ang paathag sang lima ka mga empleyado nga nag-alegar ginkawat ang mga salakyan sang siudad nga gin-assign sa ila.
Suno kay City Legal Officer Romeo Carlos Ting, Jr., ila madasun nga iga-submit sa Commission on Audit ang explanation sang lima ka mga empleyado antes posible mapasakaan sila sang kaso administratibo sandig man sa mando ni Mayor Albee Benitez.
Gindugang ni Ting nga mahimo pabayaran man sa mga empleyado ang mga salakyan kag motorsiklo nga nagabalor sa malapit tunga sa milyon ka pesos. Sa 45 ka mga missing nga salakyan sang siudad, may 20 na ang nakit-an.
Kalabanan diri unserviceable na kag mga guba.
Padayon pa nga gina-locate sang katapo sang General Services Office ang pila pa ka mga government vehicle nga kalabanan na-assign sa Bacolod City Police Office.