Misis patay matapos gintiro ni mister bangud sang pagpangimon. Gin ako sang suspek sa PNP nga humalin niya pa kagab-i nga gina libot-libot ang salakyan sakay ang bangkay sang iya misis.
Gin-report sa Dumaguete City PNP nga may awto nga ginbilin sa may taytay sang Barangay Tabuc-Tubig, Dumaguete City kaina sang kaagahon kag nakita nga may bangkay sang isa ka babaye nga yara sa front seat.
Sang gin usisa, nahibaluan nga isa ka nurse ang nasapwan nga patay. Sa report sang Negros Oriental Police Provincial Office, 36 anyos ang biktima nga isa ka nurse nga taga Luzon.
Suno sa PNP nag away pasado las sais sang kagab-i ang biktima kag ang iya 39 anyos nga bana nga isa man ka nurse sa lain man nga opsital.
Naiguan sang bala ang li-og sang biktima. Dugang pa sang pulis, third party ang gin awayan sang duha. May gina pangimonan ang suspek.
Matapos matiruhan sang bana ang iya asawa, ginlibot libot niya lang ang salakyan sa Dumaguete tubtob mag kaagahon samtang yara lang sa sulod man sang salakyan ang bangkay sang iya nga misis.
Nadakpan ang bana sa balay sang iya nga abyan kag yara na karon sa kostodiya sang PNP.
Gina pangita pa ang pusil nga gingamit sang suspek.
Hungod nga wala ginhingadlan sang PNP ang duha kay wala pa makahibalo ang ila nga mga pamilya sa natabo kag isa ini sa sensitibo nga kaso. Kasuhan sang PNP ang bana sang murder.