Gindakop sa kaso nga parricide kag murder ang babaye nga ginatudlo mastermind sa pagpatay sa iya mismo bana nga isa ka soldado sa Purok Kalubihan, Barangay Maquiling sa Sagay City sadtong Mayo 12.
Sang Lunes, gin-aresto ang suspek nga ginkilala kay alyas “Bang-Bang”, 29-anyos sa Barangay Bulwang, banwa sang Mabinay, Negros Oriental.
Ginsiling ni Police Lt. Col. Alvimar Flores, hepe sang Sagay PNP, nagwa sa imbestigasyon nga si alyas “Bang-Bang” ang nagdihon agod mapatay ang iya bana kag ang isa sa duha ka mga gunmen ang ka-relasyon sang misis.
Sang Mayo 12, gintiro kag napatay sang motorcycle-riding suspects ang 48-anyos nga si Corporal Robert Dador, na-assign sa 79th Infantry Battalion, residente sang Zarraga sa Iloilo, kag isa ka assistant detachment commander.
Patay man ang upod sini nga isa ka CAFGU Active Auxiliary member, ginkilala kay Johnrey Moncatar, naga-edad 26-anyos, taga Brgy. Celestino Villacin sa Cadiz City.
Ang gunman nga ka-relasyon sang misis, ang nadakop sa buy-bust operation sa Mabinay sadtong Mayo 27, 2026 kag karon naka-detain na sa Bureau of Jail Management and Penology sa Mabinay.
Suno kay Flores, si “Bang Bang” ang nahunong karon sa custodial facility sang Sagay PNP kag ang isa na lang ka gunman ukon ang ikatatlo nga suspek ang nagapabilin nga unidentified kag at large.
“Tungod na sa natipon nga statements sang mga witnesses kag mga evidences nga sila ang ginatudlo, ang tatlo ka mga suspects. Makabig na ang kaso nga crime cleared kag crime solved,” pahayag ni Flores.*
[sibwp_form id=1]