Tatlo ka mga salakyan ang imbulbado sa traffic incident nga nagluntad sa dalan Lacson, Barangay 7 sa siudad sang Bacolod, Domingo sang kaagahon.
Ang mga imbulbado nga salakyan amo ang Nissan Terra, Toyota Raize kag Hyundai Reina.
Base sa imbestigasyon, nagapadulong sa nasidlangan nga bahin sang 12th Street ang Toyota Raize kag pagwa sa dalan Lacson sang nabungguan sang Hyundai Reina ang pang-ulihi nga bahin sang mini-SUV.
Bangud sang impact, nagbaliskad ang Toyota Raize kag naiguan ang naka-park nga Nissan Terra.
Nakaangkon sang minor injury ang driver sang mini-SUV.
Ginsiling ni Major Elmer Bonilla, chief sang Traffic Enforcement Unit nga under investigation sa gihapon ang insidente kag wala pa sang settlement sa tatlo ka mga imbulbado nga driver.
