Matapos nga nakigsapol ang siudad sa mga vendors sa palibot sang Bacolod City Government Center, nakasugtan na ang pagsaylo nila sa isa ka pribado nga duta sa likod sang BCGC nga ginapanag-iyahan sang pamilya Gonzaga.
Ginsiling ni Bacolod City Administrator Atty. Mark Steven Mayo nga tuyo sang siudad nga mahawanan na gikan sa mga negosyo ang palibot sang BCGC bangud nakasaad sa deed of donation nga ginadumilian ang ini nga sahi sang aktibidad.
Huwebes nga adlaw, gintipon sang siudad ang mga vendors sa palibot sang BCGC kag ang pila man ka vendors sa North Capitol Road nga wala sang special permit kaupod ang pamilya Gonzaga agud maplastar ang plano nga pagsaylo sa ila sa likod sang BCGC.
Nangin positibo man suno kay Mayo ang sabat sang mga vendors. Handa man ang pamilya Gonzaga nga magpatukod sang covered area sa likod sang BCGC kag mapatakdan ini sang kuryente.
Kabaylo sini, 100 pesos kada 6 square meter ang balayran sang mga vendors sa kada adlaw bilang renta.
May tatlo na ka sahi sang negosyo ang nakasugtan nga ipahamtang sa amo nga lugar. Ini ang mga fingerfood, ukay-ukay, kag blind massage, samtang ginatun-an pa ang pagbutang sang chicken inasal area.
Masobra sa 100 ka mga vendors ang sarang nga ma-accomodate sang amo nga lugar nga magabukas lamang kada las tres sang hapon tubtob las dose sang kaagahon.
Dugang ni Mayo, kon yara na sa amo pribado nga lugar ang mga vendors mangin ligal na ang ila pagbaligya.
[sibwp_form id=1]