Biyernes sang nagligad nga semana sang nakutkutan ang mga tul-an sa kilid sang gymn sang Central Philippine State University ukon CPSU gym sa Brgy. Camingawan, Kabankalan City.
Sa report sang Kabankalan City Police Station, nasapwan ang mga tul-an sang mga naga-obra sang septic tank. Gilayon nga gin-endorse sa Cultural Heritage Center/ Museum sang ekswelahan ang mga tul-an.
Suno sa in-charge sang museum nga si Dr. Jose Gay D. Gallego, Director of Historical and Cultural Heritage sang CPSU, patyo sang mga indigenous people ukon IPs ang lugar antes pa man natukod ang eskwelahan sang 1946.
Gindugang pa ni Dr. Gallego nga posible masobra isa ka gatos ka tuig ang mga tul-an. Suno naman kay Police Major Joelan Vinson, Deputy Chief of Police sang Kabankalan City Police Station, wala naangot sa ano man nga krimen ang nasapwan nga tul-an.
Magabulig ang CPSU sa pagpa-examine agud mahibaluan ang edad kag kun iya ka babayi ukon lalaki ang mga tul-an.