Natalana bwas nga magsapol ang MARINA, Philippine Coast Guard, Philippine Ports Authority, mga shipping kag fast craft operators kag tiglawas gikan sa lokal nga pangulohan sang Bacolod kag Iloilo.
Ini agud isturyahan ang mga health protocol kag guidelines nga dapat ipatuman sa pagbalik sang commercial trips sa pwerto sang duha ka mga siudad agud mapangapinan ang ikaayong lawas sang mga pasahero kag crew.
Nagpagwa na si Iloilo City Mayor Jerry Trenas sang executive order nga nagapahanugot sa pagbaton sang mga pasahero gikan sa Bacolod City.
Ginpahayag man ni Bacolod City Mayor Evelio Leonardia nga naga-upod siya sa pagpanumbalik sang mga trips sa pwerto pakadto sa Iloilo kag Bacolod basta estrikto lang nga sundon ang mga health protocols.
Suno sa fast craft operator nga si Frank Carbon, magluwas sa mga ipatuman nga health protocols kag guidelines paga isturyahan man sang mga operators ang ila schedule sang mga trips agud masiguro nga wala sang pag-inagaway sang mga pasahero kag may masakyan ang mga pasahero sa kada oras.
Gindugang pa ni Carbon nga ginapaabot ang pagbalik sang mga trips sa mga pwerto sa weekend ukon sa madason nga semana.