Sa kada adlaw kinahanglan ni Herminia Amador magwa para sa ila nga mga kinahanglanon pero bangud naguba ang alagyan nila nga hanging bridge sa Malisbog River sa Barangay Hawaiian sa Silay City, kinahanglan niya mag sakay sa improvised nga zipline.
Ang ini nga bata naga duha duha mag sakay sang kaulba, ginsipit sang tiyo kag ginsabak sa zipline kag gin duso…
Si Anita Claridad madul-ong sang mga tinapay sa iya nga utod sa tabok sang suba, humalin sang sabado na anad na siya mag sakay diri
Humalin aga tubtob mag gab-i ini ang ila pamaagi sa pagtabok sa suba matapos maguba ang taytay bangud sang baha.
Si Arnel Perez nga isa man sa mga residente sa lugar ang taga trabaho sadto anay sa Saudi Arabia bilang rigger man. Sang naguba ang taytay napensaran niya nga ubrahan sang improvised nga zipline ang iya mga kaingod para lang maka tabok sila.
Suno sa kay Punong Barangay Henry Belleza, naguba man ang steel bridge nga naga angut sang barangay e lopez kag hawaiian sang new years day nga baha.
Pero mas dako ang epekto sang pagka guba sang sini nga hanging bridge sa Malisbog bangud may masobra sa isa ka gatus ka mga residente ang naga tabok diri.
Gin assess na kuno sang City Engineer’s Office ang damage kag naga himo na karon sila sang plano para maubrahan sila sang taytay.
Aprubado naman ang 300 million pesos nga proyekto sang DPWH nga paghimo pa gid sang taytay nga sarang na malabyan sang salakyan sa sini nga suba pero medyo madugay dugayan pa.
Kaina may isa ka grupo nga nag padulong sa malisbog para magdul-ong sang mga bugas kag delatas sa mga residente. Anay residente sang lugar si Mira Miran, siya ang nag facilitate sa mga donasyon sang iya hinablos nga yara sa luwas para sa ila pamilya kag mga residente.
Sa elementary school may yara sa gihapon sang kapin sa isa ka gatus ka mga evacuees nga naga pabilin. Wala sila anay nagbalik sa ila nga mga balay bangud sang lunang dala sang baha kag bangud naga inulan pa.