Ginpatawag kahapon sang mga opisyales sang siudad sang Bacolod ang tanan nga mga punong barangay para ipalab-ot sa ila ang mga kinahanglanon nga pagpanghanda sa 22 ka mga lugar nga natalana nga himuon nga vaccination center.
Ginpahayag ni Councilor Renecito Novero nga mas maayo kun temprano mahibaluan sang mga punong barangay ang ila mga kinahanglanon nga himuon para masuguran na ang pagpanghanda.
Ang mga health centers nga yara sa tupad sang barangay gym ukon buluthuan ang mga ginpangpili sang siudad nga himuon bilang vaccination centers.
Ini agud mangin mahapos ang pagtipon sang mga pumuluyo nga pagadapatan sang COVID-19 vaccine.
“So kinahanglan sila kay agud first of all kay ang campaign for educating and registering our vaccinees in each barangay. Number two in preparing the physical arrangements sang aton mga vaccination centers. Number 3 in the preparation of all technical equipment nga kinahanglanon which will involve refrigerating machines and generators. The next point is of course helping sa pag police agud ma crear sang smooth flow sang aton vaccinees,” suno kay Novero.
Ginpasiguro naman ni Mayor Evelio Leonardia ang mga punong barangay nga sigurado na nga makakuha sang bakuna ang bacolod bangud may napirmahan na nga kontrata sa AstraZeneca Pharmaceutical Philippines kun sa diin may initial purchase order ang siudad nga 650,000 ka mga vials sang vaccine.
300 million pesos ang initial nga budget nga gintalana sang siudad para sa pagbakal sang bakuna.
“This is in the concept nga dapat makahambal kita bala nga we should hit the ground running nga apesar mag abot inang vaccine nga ina preparado na ta kag ma remind lang ko sa pumuluyo kay at least may mga lima pa ta ka bulan nga palaabuton so mentras tanto masigi ta gyapon bantay sa covid kay ara gyapon ang COVID,” suno kay Leonardia.
Ginpahayag man ni Leonardia nga natalana si vaccination czar Secretary Carlito Galvez nga magbisita sa Bacolod sa madason nga bulan agud nga maisturyahan ang gin order nga mga bakuna sang siudad.
Ang Bacolod ang isa sa mga local government unit sa pungsod nga temprano nga nakapirma sang kasugtanan sa AstraZeneca para sa COVID-19 vaccines.