Humalin kahapon tubtob subong nga adlaw ang pag pauli sang mga evacuees nga indi sakop sang 6 kilometer extended danger zone.
Isa ka libo ka persona ang tigayon na nga naka pauli sa ila nga mga balay sa Brgy Sag-ang, Mansalanao kag Cabagna-an sa La Castellana.
Suno kay John de Asis ang pamuno sang Disaster Risk Reduction Management Office, may 2,000 sila ka mga pumuluyo nga maga pauli kag subong nga adlaw padayon pa ang paghikot sa ila nga pagbalik sa ila nga mga puluy-an.
Sa La Carlota City suno sa pamuno sang Department of Social Welfare and Development nga si Angie Gelongo may pito ka pamilya nga boluntaryo nga nag biya sa evacuation center kag nabalik sa Brgy Yubo kag may duha ka pamilya nga nag-transfer sa ila nga himata.
Suno kay Gelongo ang pito ka pamilya ang pabalikon ni Mayor Rex Jalandoon sa evacuation center.
Wala sila sang may napa gwa nga decampment order.
Sang Miyerkules, 461 naman ka persona sa Bago City ang tigayon nga nakapauli na sa ila nga mga balay. Ginsiling naman ni Office of the Civil Defense – NIR Regional Director, Donato Sermeno, III nga sa ila datus, sa Canlaon City may 278 man ka pamilya ang ginpapauli.
Ginsiling ni Raul Fernandez ang Task Force Kanlaon head nga kun siya man lamang mag buot, luyag niya nga sa tent cities na lamang kuntani maga tenir ang mga nag pinauli bangud mas mangin safe kag mahapos ini enkaso nga may paglupok sa bulkan Kanlaon.
Suno kay Governor Eugenio Jose Lacson, luyag niya personal nga masugilanon si Fernandez bahin diri kag mapatpat man kun ano gid ang plano kag paano ipadalagan ang tent cities labi na ang pagsabat sa mga kinahanglanon sang mga evacuees nga maga tenir diri.
Klaro ni Lacson nga ang mga gin papauli nga pumuluyo indi sakop sang 6 km danger zone gani wala man sang may nasupak sa guidelines.
Kag nahangpan man sang LGU ang ila nga papel sa pag evacuate sang mga natungdan enkaso nga mag lupok ang bulkan.