Indi malikawan sa obra sang kapulisan nga sila ang mag-atubang sa stressful kag traumatic nga mga insidente samtang naga-duty sa ila tagsa ka area of responsibility.
Gani, sang Miyerkules, Agosto 13, nagpatigayon ang Police Regional Office-Negros Island Region sang debriefing session sa 18 ka mga personnel.
Na-assign ang mga police officers sa police stations sang Cadiz, Kabankalan, San Carlos, Binalbagan, Candoni, Cauayan, Don Salvador Benedicto, Hinigaran, Ilog kag Toboso.
Sini gid lang, sila ang nga naka-eksperyensya sang makabig stressful kag traumatic nga mga insidente samtang nagapatigayon sang police operations ukon na-expose sa mga high-risk kag emotionally-demanding nga mga sitwasyon.
Suno kay Major Junette Cañete sang Regional Medical and Dental Unit 6, isa ka paagi ang debriefing agud buligan ang mga indibidwal nga ma-proseso kag maka-cope sa mga traumatic kag stressful events.
Makabulig ang stress debriefing, suno kay Cañete, para ma-manage sang mga kapulisan ang emotional demands sang ila obra, ma-improve ang ila mental health kag well-being agud magmayo man ang ila performance.
Expose ang mga pulis sa mga distressing events kaangay sang violent encounters nga nagatuga sang acute stress, emotional fatigue, ukon trauma, gani suno kay Cañete, kung wala sang early psychological intervention, posible nga ma-develop ini sa mas seryuso nga mental health condition kapareho sang Post-Traumatic Stress Disorder (PTSD), anxiety disorders kag depression.