Ang scenario, may karton nga ginbilin sa isa ka lugar kag gina suspetsuhan nga improvised explosive device ang unod.
Gamit ang moderno nga mga equipment sang pnp ginpakita sang mga katapo sang Explosive Ordnance Disposal Unit ukon bomb squad sa 30 ka mga pulis nga ila gina training kun paano ini i handle.
Gin preparar ang water cannon disruptor nga amo ang gamiton sa pagtapna sang bomba.
Ang ini nga miyembro sang bomb squad amo ang ma palapit sa bomba. Ginpasuksok sang bomb suit nga naga bug-at sang 50 kilos. Gin briefing anay antes palapitan ang package.
Ginplastar niya na ang water canon disruptor sa atubang sang box kag gin bitbit ang mobile xray, ginkuhaan sang xray ang box para mahibaluan kun ano ang unod.
Ginbitbit balik ang film kag gin process kag nakita na ang unod sang box nga explosive device.
Matapos ma confirm, gin plastar na ang water canon para gub-on ang eid.
Sa una nga duha ka attempt, wala lumupok. Bu-ot silingon may deprensya. Kun sa matuod tuod nga operation, tensyonado na ang sitwasyon.
Sa third attempt….successful ang pag detonate sa bomba.
Second scenario…may terorista nga natiruhan pero may bag nga dala.
Gin isa isa ang proseso. Halin sa pag stablize sa iya sini nga gina uyatan pakadto sa mauti nga proseso sa pag utod sang kable kag pagpakaya sang lawas
Sa amo sini nga sitwasyon indi pwede mapalupok ang bomba upod ang persona.
Gin amat amat asta nautod ang bag kag naseparar sa lawas sang tawo
Suno sa regional director sang EOD and Canine sang Region 6 nga si Major Gary Allan Resuma, importante nga matudlu-an ang mga pulis sang sini nga pamaagi para kun wala sang mga taga EOD
nga ara sa ila nga area, nakahibalo na sila sang dapat nga himuon.
Kag sa third scenario, tuman ka delikado sang stiwasyon kag dapat wala sang tawo nga mapalapit sa bomba. Gani ang gin gamit MK3 EOD Robot. May anum ka mga robots ang PNP sa Pilipinas nga sarang maka detonate sang bomba. Apat diri ang hatag sang US government. Tag 17 million pesos ang kada unit. Ang ini nga robot iya ka Region 7 kag na assign sa Cebu gina hulam man sang Region 6 kun kinahanglan.
Ini ang remote control nga naga padalagan sa iya kay may yara man sang transmitter.
Ang robot may kaugalingon man nga water canon disruptor kag may camera sa palibot.
Kun ma kumpirma na nga bomba gid man ang unod sang package pwede na ini mapa dalagan. Pwede ini maka saka tubtob sa third floor sang building.
Ginpangita na sang robot ang bomba kag sang makita kag maka plastar na, iya man ini nga gin guba gamit ang water canon disruptor.
Suno kay Resuma ang pangontra sang gobyerno naga evolve man kag naga moderno ang tekonolohiya gani nagaka angay lang nga mag evolve man ang gamit sang PNP para mapunggan ang pangontra.
Ang treinta ka mga pulis nga gin training gikan sa nagkalain lain nga police stations sa Region 6, ang ila natun-an ang ila man nga ipa hibalo sa ila kaupdanan para handa man sila mag responde sa mga amo sini klase nga insidente.