Tinuig na nga nagabyahe sang Central Market-Sta Fe nga si Robert,pero suno sa iya wala pa siya nakabaton sang ayuda humalin sang nagsaka ang presyo sang produkto petrolyo sa pungsod.
Isa si Robert sa nubentay sinko porsyiento sang mga drayber sa probinsya nga wala makabenepisyo sa ginahatag nga ayuda sang gobyerno bangud wala man siya sang pantawid pasada cards nga masami gina uyatan sang mga operator.
Sa dialogo sa tunga sang katapo sang transport group upod sanday mayoralty candidate Albee Benitez, Congressman Greg Gasataya kag Stephen Paduano upod sa Land Transportation Franchising and Regulatory Board.
Gin ayo sang grupo nga kuntani ipaagi na lang sa mga gas station ang pagpanagtag sang ginalauman nga fuel subsidy.
Ini agud man rekta nga makabenepisyo ang drayber sa pihak man sang pagsaka sang presyo sang produkto petrolyo.
Ginduso naman ni Benitez ang blanket subsidy sa presyo sang produkto petrolyo agud insigida ini nga mabaton sang mga drayber kag agud indi man maapektuhan ang presyo sang iban pa nga mayor nga balaklon sa pagsaka sang presyo sang petroleum products.
Ang siudad sang Bacolod ang handa man nga maghatag sang ayuda sa katapo sang transport group.
Nagdesisyon ang katapo sang transport group nga mag dayalogo sa LTFRB kag indi na pagsigehon ang kuntani duha ka adlaw nga pag untat byahe matapos ang ginpangunahan nga congressional hearing nanday Gasataya kag Paduano para mapasiguro nga maka ambit sang fuel subsidy ang may siete mil ka mga miembro sang tatlo ka mga transport group sa probinsya.