Shadow

Mga pantyon ginpang bendisyonan sang pari antes magsirado ang mga patyo

Antes pa man magsirado ang mga patyo subong nga adlaw, ginpangkadtuan na ini sang kahapon ni Father Joriz Calsa, ang assistant parish priest sang St. Joseph The Worker Parish sang Canetown sa Victorias City.

Nahangpan niya nga indi tanan nga pantyon mabisita sang ila nga mga himata bangud sang pandemic.

Sang maka pangita sang bakante nga oras iya na ini nga ginlibot.

“And since COVID time bal-an ko gid nga indi sila maka bisita mong. As a priest with the power to bless, and with my personal prayer gid nga tani da maluwas si Lord this season gin isa isa ko gid ya,” suno kay Fr. Calsa.

Sa iya halos duha ka dekada nga pagka pari first time niya ini nga ginhimo nga naga isahanon.

Sa sulod sang tatlo ka oras, ginpang isa isa niya ang mga pantyon sa kada patyo.

Iya man ginpang tultol ang mga pantyon sang naghikog kag mga ginpang abort nga lapsag.

Ang iban gani kuno sa mga pantyon ang napabay-an na.

“Naga tudlo sila, father amo ni ang naghikog father. kay kabalo sila , sakristan sila mong. Ma pondo ko tagaan ko sang prayer. Makita mo gid sino ang pobre. Ang iban sa kilid lang ginlubong. Sa kilid lang gin derecho. Ang semento very rough, ang lapida , wala nag ani lapida mong. I’m just sure nga may nalubong diri kay may naga ulbo mong,” suno kay Fr. Calsa.

Naga panawagan siya sa publiko nga buligan pangamuyo ang mga nagtaliwan na para mabuligan ang ila nga mga kalag sa pagkadto sa langit.

“Nami bala mag pray sa mga patay kay for example, this month of November kun kita tanan mag pray sa mga souls… Wala lang gid ta ya kabalo nga dungan dungan sila saka. Can you imagine nga ikaw ang instrument nga sila ang masaka sa langit kag ang first nila nga i istorya kay Lord, may nag pray sa akon,” suno kay Fr. Calsa.

Sa sulod sang simbahan nagbutang man sila sang memorial wall kun sa diin pwede maka halad sang kandila kag pangamuyo sa mga himata ukon abyan nga nagtaliwan na.

Sarang man masulat ang ila nga ngalan sa wall.

Tumandok sang Victorias City si Fr. Calsa kag na assign sa Cebu sang malawig nga panahon. Sa iya liwat nga pagbalik sa Victorias naga laum siya nga himuon ini nga tuigan niya na nga panata.

Leave a Reply

Your email address will not be published. Required fields are marked *

Secured By miniOrangeSecured By miniOrange