Daw yara ka lang sa showroom kun imo makita ang mga gina display nga garden set, mga pots,lamps kag miniature garden fountain sa kilid sang Murcia-Alijis Road sa Purok Lote sa Barangay Alijis sa Bacolod.
Himu ini sa semento kag kabilya nga mauti nga ginaporma gamit ang improvised nga hurnohan.
Ang stentay uno anyos nga anay construction worker nga si Antonio Jamon ang una nga nagtukod sang sini nga palangabuhian mga pila na ka dekada ang nagligad.
Wala man siya maglaum nga sang nagsugod ang pandemic sang nagligad nga tuig nangin patok ang iya mga produkto.
Sang nagligad nga tuig sarang siya nga maka income sang otso tubtob dies mil pesos ang bulan halin sa mga baligya nga mga pots kag miniature pagoda lamps.
Ang hinablos ni Jamon nga si Rodolfo Japitana nga nangin iya man assitant ang isa sa mga nanubli sang iya abilidad nga karon isa sa mga nagabaligya man sang outdoor furniture kag garden set sa kilid sang dalan.
Kada semana , masako man si japitana sa pag-ubra sang mga garden set nga iya ginabaligya sa tag sinko mil pesos.
Suno sa mag-tiyo nangin suki na nila ang kadam-an sa mga resort owners kag bisan mga tag-iya sang mga kilala nga restaurant.
Ang mga pillar sculpture nga ginabakal sa ila sang mga kilala nga personalidad, mga dalagko nga stone sculpture nga makita sa mga bantug nga kalan-an sa Bacolod ang pila lang sa ila ginapabugal nga obra.
Pareho na nga may mga edad ang magtiyo gani magluwas nga limitado na lang ang ila mabuhat nagabatyag naman sila sa epekto sang pandemic bangud ini na lamang ang ila masarangan nga maubra.
Humalin sang nagligad nga tuig, naka-amat amat naman kuntani si Jamon sa pag pamakal sang construction materials para bisan paano mapakaayo ang ila balay.
Apang tungod malaka naman ang mga nagabukas nga bag-o nga negosyo sa siudad, masami nagapunsok na lang sa ila puluy-an ang mga produkto nga indi gilayon mabayaran kag mabakal sang customer.
Nagalaum sila nga kuntani maka-recover na ang pungsod sa epekto sang pandemic agud bisan paano malampuwasan man nila ang hangkat sang kapigaduhon.