Kalabanan naga hulat sang ila nga mga National IDs nga mag abot pero sa Bacolod, may mga National Ids nakit-an sa basurahan sang isa ka mall.
Nagalain ang buot sang merchandiser nga si Nayma Magondacan sang mabaton ang iya National ID gikan sa housekeeping personnel sang 888 Chinatown Square Mall kun diin siya nagatrabaho.
Ini sang mahibaluan nga sa basurahan nakit-an ang iya id nga malawig niya naman nga ginahulat nga mabaton.
Upod sa iya National ID ang mga ID man sang iya himata nga nahaboy sa basurahan sang mall sang Nobyembre 29.
Nakalab-ot na ini sa igtalupangod sang Philippine Statistics Authority.
Ila na ini nga gina usisa kag ila nga gina hibalo kun paano ini nakalab-ot sa basurahan sang mall.
Masami ang National ID ang gina deliver sa mismo balay sang natungdan.
Nagligad nga binulan may ginreport man nga mga national ID nga nakita sa basurahan sa banwa sang Cauayan.
Nakig-angut naman si Punong Barangay German Bullolaza sa mga nagreklamo nga ID holders nga residente sang Barangay 31.
Ini agud mapat-ud kun ano gid ang natabo.