Malapit napulo ka mga greenhouse facility sa Bacolod nga halos napabay-an na ginatinguhaan magamit liwat sang City Agriculture Office.
Daw bakante na lang nga wayang ang anay demo farm sa sulod sang Bacolod Boys Home sa Barangay Granada sa Bacolod.
Gani kaina ginhawanan ini sang katapo sang City Agriculture Office kag mga barangay officials sang Barangay 1.
Ginbuksan kag ginhawanan nila pati na ang wala na magamit nga greenhouse facility nga anay ginatanuman sang lettuce.
Kabulig sang City Agriculture Office ang negosyante nga si Engr. Ian Fred Solas nga ginakabig pioneer sang hydroponics agriculture sa Negros.
Kanugon para kay Solas nga napabay-an ang 10 sa malapit 12 ka mga greenhouse facility.
Tuyo niya nga magbulig sa siudad agud mabalik ang operation sang mga greenhouse facility agud mas mapasanyog ang food security program sang Bacolod.
Ginalauman nila nga kuntani mahuman ang construction sang training facility agud nga madamo pa nga mga urban farmers ang mabuligan kag magdamo ang mga hubenes ang maganyat nga magtanom.