Ginsaylo na sa Payag sang Kapag-on Village sa Barangay Napoles sa Bago City ang 22 ka mga internally displaced families Lunes sang aga.
Ang 22 ka pamilya ukon 80 ka mga indibidual ang gikan sa Regional Evacuation Center sa Barangay Lag-asan sa Bago City.
Sila ang mga pumuluyo sang Purok Manokan sa Barangay Ilijan kag gin-evacuate bangud sakop na sila sang 6 kilometer danger zone sang bulkan Kanlaon.
Ginpahamtang sang siudad sang Bago ang Payag sang Kapag-on sa 7-hectare property sini sa Napoles para mag serbe nga temporary resettlement site sa mga apektado nga pumuluyo sini kasunod sang paglupok sang bulkan Kanlaon sadtong Disyembre sang nagligad nga tuig.
Tigaylo sang modular tents, ginpakamaayo sang lokal nga panguluhan nga gamiton ang modernized nipa huts ukon ang mga bahay kubo bangud sang sustainability sini.
Tubtob sa karon naga pabilin sa Alert Level 3 ang bulkan kag indi pa mapat-od kun san-o mahatagan sang clearance ang mga gin-evacuate sa pag balik sa ila tagsa ka mga puluy-an.