Motorsiklo, tricycle ukon salakyan man, isa-isa nga ginaparahan sang katapo sang Bago Component City Police Station upod ang Highway Patrol Group kag Traffic Management Unit sa tatlo na ka adlaw nga checkpoint operations sa dalanon sang Bago City.
Martes tubtob subong nga Huwebes, hugot nga ginapatuman sang otoridad ang mga layi sa trapiko kaangay sang “No Plate, No OR/CR, No Driver’s License, No Travel Policy”.
Gina-check sang kapulisan kag traffic personnel kun may yara sang dala nga official receipt ukon certificate of registration sang salakyan kag driver’s license ang mga drivers.
May pila man nga mga gindakup bangud wala nagasuksok sang helmet.
Suno sa Bago PNP, indi rason nga lapit lang ang kadtuan sa indi pagsuksok sang helmet sang driver kag back-rider.
Istrikto man nga ginpatuman sang otoridad ang pagpanakop sang mga motorsiklo nga may magahod nga tambutso ukon may open pipe mufflers.
Pila ka mga violators nga wala nagasunod sa traffic laws ang nasampolan kag ginkumpiskar ang ila mga driver’s license.
Ginklaro sang Bago PNP nga ang ila mga traffic operations sa dalanon ang indi silot kundi prevention sa mga traffic incidents nga resulta sang pagpabaya ukon indi pagsunod sang mga rules sa dalan.
Dugang pa sang Bago PNP nga responsibilidad sang tanan ang road safety gani ila ginapangabay ang mga motorista kag pedestrians nga indi magpasaway.
[sibwp_form id=1]