Wala na masalbar ang mga school supplies kag equipment sang masunog ang stockroom kag library sang Mansilingan Agro Industrial High School sa Bacolod pasado las onse sang Martes sang gab-i.
Kabahin sa ginlamon sang kalayo ang ginatus nga ream sang bond paper nga pagagamiton kuntani sa pagbukas sang klase.
Dugang diri ang mga libro kag laboratory equipment nga wala masalbar sa sunog.
Kaina ginhingagaw sang pamunuan sang eskwelahan nga mabutangan sang baral ang atubang sang nasunog nga school building nga amo ang alagyan sang mga ginikanan nga nagakuha sang module sang ila kabataan.
Nagahinyo man karon sang bulig si school principal Michael Divinagracia agud bisan paano maislan ang mga nasunog nga 400 reams sang bond paper nga para kuntani sa mga module sang estudyante.
Sa pagpangusisa sang bureau of fire protection, nagsugod ang sunog sa stockroom.
Indi pa mapat-ud kun electrical in nature ang ginhalinan sang sunog.
Ginabulubanta nagalab-ot sa isa ka milyon ka pesos ang halit nga natuga sang kalayo.