Mga apektado nga rice farmers bangud sang El Nino Phenomenon ang mahimo maga baton sang 2,500 pesos nga assistance gikan sa gobyerno probinsyal.
Sa pagsapol ni Governor Eugenio Jose Lacson sa pamuno sang Office of the Provincial Agriculturist padayon pa ang pag survey kun pila gid ka rice farmers sa probinsya ang may kahalitan sa pananom bangud sang tuman nga kainiton.
12.8 million pesos ang gin-report kahalitan sa humayan sa pito ka mga banwa kag siudad kag kalabanan sa sining mga talamnan mga rainfed ukon naga salig sa ulan.
Paathag sang gobernador sang nagligad pa nga tuig gin abisuhan na ang ini nga mga mangunguma nga ipaiway ang pagtanom bangud sang ginapaabot epekto sang El Nino Phenomenon, rason man nga wala na sila nag pa rehistro sa crop insurance.
Ang mga mangunguma nga yara sa tailend ukon sa punta na gid sang irigasyon apektado man, amo nga gina patigayon ang clean-up sa mga canal para mahilway sa mga basura nga naga bara sang irigasyon.
Gina hatagan man sang konsiderasyon sang probinsya ang cloudseeding operation para mabuligan ang mga pananom pero lantawon pa kun ma pondohan ini. Importante man suno kay Lacson ang mga panganod para indi man manugon ang cloudseeding efforts.