Sang tinalikdan nga semana, nagreklamo ang mga pumuluyo sa ibabaw nga bahin sang Barangay Alangilan sa syudad sang Bacolod, bangud sang tuman kagahod nga tambutso sang mga motorsiklo nga nagapadulong sa ila lugar.
Ang iban sa ila, suno sa mga residente, ang nagapangbuka pa sang botelya kag nagasinggitan.
Sa video nga gin-post sa social media sang isa ka residente, makit-an nga ila ginbalabagan ang mga motorista nga may magahod nga mga tambutso.
Sini nga semana, asud-asud ang ginpatigayon nga checkpoint operations sang Bacolod City Mobile Force Company sa mga dalanon sang barangay.
Naga-roving man kada gab-i ang kapulisan sang Police Station 5 upod ang mga tanod kag opisyales sang Barangay Alangilan.
Ginsiling ni Capt. Hazel Oropel, hepe sang Station 5 nga magluwas sa may mga magahod nga tambutso, sila man ang nagapanaway sa mga minors nga nagalagaw kun gab-i, sa mga naga-inom sa pampubliko nga lugar, nagapanglapta sang basura kag naga-obstruct sa dalanon.
Suno sa hepe, dako ang bulig sang pagpahibalo sa mga tawo sa mga nagkalain-lain nga city ordinance may angut sa anti-noise pollution, curfew for minors, kag iban pa sa pagpabilin sang kalinong kag katawhay sang lugar.
Naghagan-hagan na suno sa pulis ang mga pasaway sa area sang Alangilan.