Pag submit sang mga LGU sang na reconcile nga masterlist sa mga benepisyaryo para sa cash assistance gikan sa National Housing Authority ang padayon nga gina hulat sang probinsya.
Tubtob nga indi ma reconcile ukon masanto ang masterlist sang mga banwa kag siudad sa mga Odette beneficiaries sa una nila nga lista nga gin-submit indi masugdan ang pag panagtag sang cash assistance.
Ini suno kay Provincial Administrator Rayfrando Diaz nga nagsiling nga ginadalian naman ini sang probinsya para ma release ang 94.6 million pesos nga pondo bilang bulig sa na apektuhan sang Bagyo Odette.
Kinahanglan nga ang probinsya ang maga release sini kay ang accountability yara sa Negros Occidental.
Kinahanglan ang pagsanto sa masterlist para indi magkulang ang pondo kag agudto nga malikawan ang discrepancy sa records. Natalana naman pagpanagtag sang assistance kasubong sang GI sheets, food packs kag banana seedlings sa Hinigaran sa masunod nga semana.