Pamuno sang Commission on Elections sa Negros Island Region ang naga pahanumdom sa tagsa ka kandidato nga indi mag lisa sa pagsulundan agudto malikawan ang ano man nga election offense ukon disqualification.
Sa Negros Oriental ginpamunuan ni NIR Assistant Regional Director, Atty Jossil Macute upod ang Provincial Elections Supervisor nga si Atty Eddie Aba kag COMELEC Dumaguete ang pag kakas sang mga campaign materials nga wala sa mga designated common poster areas.
Suno kay Atty Lionel Marco Castillano ang COMELEC NIR Director, ginadumilian ang pagbutang sang campaign materials sa mga publiko nga lugar nga wala ginakabig common poster area.
Dapat wala man ini naka kab-it sa mga electrical posts, kasubong man sa mga kahoy, sa mga taytay, waiting shed kag public buildings kaangay sang barangay hall.
Wala labot sini gina pahanumdom man sang COMELEC ang tagsa ka kandidato nga indi mag overspend. Dapat i-report ini sa SOCE ukon Statement of Contributions and Expenditures.
P3 sa kada botante ang sarang magasto sang isa ka political party candidate kag P5 naman ang magasto sang isa ka kandidato nga wala sang partido.
Ang mga pagsupak sa Election Laws sarang nga mangin basehan sang isa ka election offense batuk sa isa ka kandidato ukon
mangin basehan man sang disqualification. Pahanumdom ni Castillano indi ang mga campaign posters ang naga padaog sa kandidato kundi ang character sini kasubong man ang plataporma nga ginatanyag sa bumuloto.
“Hindi naman yung poster ang nagpapanalo sa kandidato. In the end of the campaign, kung ano yung character nila, kun ano yung plataporma yun ang importante”, suno kay Castillano