Nagpinauli naman ang mga internally displaced persons sang La Castellana sini nga adlaw.
Suno kay Mayor Añejo Nicor, 471 ka mga pamilya ukon 1,548 ka mga indibidual ang nagsugod pauli kaina, Biyernes sang aga karon nga yara na sa alert level 2 ang bulkan Kanlaon.
May 27 ka mga pamilya suno sa kay Nicor ang nabilin kag ini sila mga katapo sang vulnerable sector kag sakop sang 4kilometer danger zone ang ila nga mga puluy-an.
Ang banwa sang La Castellana ang may pinaka madamo nga mga evacuees matapos nga ginpasaka sadto ang alert level sang bulkan.
Suno kay Nicor, sa ila nga inagyan naga pasalamat sila sa tanan nga nagbulig sa ila pero padayon sila nga naga hulat sang ayuda sang gobyerno national kag bisan pa sang provincial government labi na nga wala na sang bilin ang ila nga quick response fund.
Gina lauman nila nga matigayon ang permanent relocation sang mga apektado nga pumuluyo.
Suno kay Provincial Administrator Rayfrando Diaz, napirmahan na ni Governor Eugenio Jose Lacson ang Deed of Sale para sa 8.6 hectares nga duta nga baklon sang probinsya sa Brgy Talaptap para mangin relocation site.
15 million pesos ang bili sini kag sa karon yara na sa documentation sa talatapan sang Bureau of Internal Revenue.
“Wala na gid kami bilin, gahulat kami bulig kay Sec Gibo Teodoro. Nag hambal naman siya nga daw downloadan niya kami sang amon gina pangayo since first eruption. Nag muno naman siya. May certification na gid kami from the accounting and the budget”, suno kay Nicor.