Commission on Human Rights sa Negros Occidental nagsugod na sa pag usisa sa natabo nga pagparada sang mga nadakpan nga wala sang helmet sa Silay City.
Suno sa pamuno sang CHR sa probinsya nga si Romeo Baldevarona nga sang Martes sang aga nagpadulong sila sa Silay City agud ma usisa ang katapo sang PNP.
Ginpaathag kuno ni Major Rolly Pondevilla nga hepe sang Silay PNP nga ginpakadto sa gym ang 39 ka mga nadakpan nga wala naga mask kay indi sila maka igo sa police station.
Naka arms forward sila para masunod ang physical distancing.
Sila kuno tanan ang wala man nagbayad sang isa ka libo ka pesos nga multa kag ginpili nga ipaidalom sa seminar sa sulod sang gym samtang naga atubang sa lungon.
Dugang pa ni Baldevarona, wala sang may nagpadulong sa ila nga talatapan para magreklamo gani sila mismo ang maga pangita sa sini nga mga persona para makuha ang ila sentimento angut sa natabo sa ila.
Damlag pa nagpabutyag sang support sa PNP si Mayor Mark Golez kay suno sa iya walo ka bulan na ini nga ginahimo sang pulis para ma disiplina ang mga pumuluyo.
Sabado sang nagpagwa sang statement ang CHR Manila nga naga kondena sa ginahimo sang PNP nga pagpaka huya sa mga nadakpan nga isa ka sahi sang human rights violation.