Cuadra Street sa Bacolod hugot nga i-monitor sang City Legal Office matapos matalupangdan ang tuyo nga pagbalik sang mga illegal settlers makaligad sang ginpatuman nga clearing operation.
Indi man madula ang baho nga ginareklamo sang mga nagalinabay nga motorista kag mismo mga empleyado sang malapit nga commercial establishment sa lugar.
Ginpahayag ni City Legal Officer Karol Joseph Chiu nga indi malayo nga magabalik gihapon ang mga street dwellers sa amo nga area gani magatalana sila sang team nga hugot nga magabantay agud indi na liwat ini maistaran kag punsukan.
Natalana nga magapatigayon sang flushing operation ang BENRO para malimpyohan ang lugar.
Ang mga na-demolish nga hayob-hayob ang naga-serbe nga ilistaran sang mga bugaw kag mga nagatalambay sa Bacolod Public Plaza.
Nangin sablag ini sa alagyan kabangdanan nga napatuman ang clearing operation upod sa barangay sang Lunes.