Mga flower vendors nga apektado sang joint development project sa Manokan Country sa Bacolod nagalaum nga masaylo sa lugar nga yara lang gihapon sa reclamation area.
Kabahin ang may 18 ka mga flower vendors sa kilid sang Fr. Ferrero Street sa mga maapektuhan kag natalana mapahalin sa tion nga suguran sang SM Primeholdings Incorporated ang pagdevelop sang 3 hectare property sang siudad sa reclamation area.
Ginsiling ni Glenn Amar, presidente sang Bacolod Flower Vendors Association nga wala sila nagapamalabag sa tuyo sang siudad.
Pero nagalaum sila nga masaylo sila sa lugar nga malapit lang gihapon sa reclamation area.
Kabahin sa ila ginata-aw nga sarang sayluhan ang dalan sa atubangan sang Pope John Paul ll Tower.
Ginatun-an man nila ang posibilidad nga magsaylo malapit sa Bacolod City Government Center kag sa ginadihon nga Asenso Yuhum Housing Village sa Barangay 8.
Ang Committee on Markets and Slaughterhouse kag City Legal Office ang ginapaabot magadayalogo upod sa ila antes pa ang natalana nga pagbalhin sa ila sa masunod nga mga binulan.