Bacolod Emergency Operation Center nagapanugyan sa mga bag-o nabakunahan na sang second dose nga magpahuway,likawan ang pagpangabudlay kag makahulubog nga ilimnon agud mapaiway sa mga sintomas sang balatian, ilabi na ang paglaton sang Covid-19.
Bisan fully vaccinated na ang isa ka indibidwal, indi nagakasayuran nga malikawan na ang paglaton sa Covid-19.
Gani suno kay Dr. Chris Sorongon, deputy medical data and analysis sang Bacolod Emergency Operation Center, importante gid ang pahuway kag pagpabilin sang minimum health standard protocol kasubong sang paggamit sang facemask kag faceshield ilabi na kun bag-o ka pa lang nabakunahan.
Sa mga nabakunahan sang second dose, indi man pwede ang magpamug-at kag magpakapoy sa sulod sang pito ka adlaw kay diri man sarang magbatyag ang lawas sang epekto sang Covid-19 vaccines ukon mga ginakabig common adverse effect following immunization. Nalakip diri ang pagbatyag sang hilanat, pagpalamuypoy sang lawas kag paghalay kag pagngutngot sang butkon kag abaga kun diin gindapat ang bakuna.
Likawan ang makahulubog nga ilimnon, pati na ang pag-pa tattoo.
Gindugang pa ni sorongon nga kun maglawig ang mga sintomas kag kun maglala pa, importante ang magakunsolta sa baylo nga mag-self medicate.