Presyo sang diesel magasaka sang masobra P3 tubtob masobra sa P5 sa kada litro sa Martes, samtang gasolina naman ang maganubo. Samtang, dugang nga mga establishment sa Bacolod nag upod sa kawsa nga pag convert sang used cooking oil sa bio diesel para magamit sang mangingisda.
Base sa computation sang Department of Energy magasaka sang masobra sa P3 tubtob masobra sa P5 ang litro sang diesel samtang manubo naman sang masobra P1 ang litro sang gasolina kag P6 tubtob P8 naman ang saka sa kada litro sang kerosene.
Indi sa gihapon estable ang presyo sang produkto petrolyo gani padayon man ang ginahimo sang talatapan ni Bacolod Congressman Albee Benitez sa paghaylo sa mga commercial establishments sa Bacolod nga i-donate ang ila used cooking oil kag i-convert sa bio-diesel. May 23 na tanan ka mga kalan-an, malls, bars, kag hotels ang nag commit nga maga upod sa sini nga kawsa.
Pinaagi sa teknolohiya sang Green Solution nga kumpanya gina convert ang used cooking oil kag oil halin sa mga gina roast nga manok kag gina convert sa bio diesel. Ang ini nga bio diesel ang gina baligya sa mga mangingisda gikan sa napulo ka mga coastal barangays sa Bacolod sa barato nga presyo para indi sila matam-an. May masobra na sa 4,000 ka litro ang nabaligya sa ila humalin sang ginlunsar ang programa sang Marso sini nga tuig.
Dugang pa ni Benitez nga sarang man ini mabaligya sang mga kooperatiba para may income sila.
Ang Department of Energy ang natalana magpatigayon sang testing sa sini nga bio diesel product para opisyal ini nga ma endorso.*
[sibwp_form id=1]