Ginpang punpon na ang mga tarpaulin kag iban pa nga campaign materials nga sang nagligad lang nagatabon sa gym sang Barangay Montevista.
Pati mga campaign materials sa mga kahoy ang ginsugdan naman pangakas sang mga opisyales sang barangay.
Sa Barangay Villamonte wala naman sang mga nagasablay nga tarp sang mga kandidato sa gym kag brgy hall.
Pero may nabilin pa nga mga campaign materials sa mga puno kag poste sang suga sa atubang lang sang temporaryo nila nga barangay hall.
Suno kay Atty. Revo Sorbito, acting election officer sang Bacolod-Comelec, dapat mapaiway ang mga government facility sa campaign materials ilabi na nga may mga gintalana man nga common poster areas para sa mga kandidato.
Sa Biyernes, Marso 25 magasugod naman ang local campaign kadungan sang regular nga operation baklas sang Comelec.