Naga problema si Evangeline kun paano niya mabayaran ang kawtro siyentos pesos niya nga bill sa kuryente nga nag overdue na.
Nadugangan pa gid ang iya nga problema bangud nahibaluan niya nga sa Lunes indi na siya pwede maka plastar sa iya gina baligyaan sang isda sa kilid sang karsada sang Barangay Bata sa Bacolod.
Sa isa ka bakante nga lote sila sadto naga baligya ugaling nabakal na ini sang pribado nga kumpanya. Gani nagsaylo sila sa higad sang dalan.
May duha pa siya ka mga kabataan kag lima ka mga apo nga gina buhi.
Ang katupad niya pwesto nga si Badong nagsiling nga ma idog idog lang sila para indi madala sa clearing operation.
May sulat na nga gin preparar ang Barangay Bata para sa tanan nga mga naga panag-iya sang illegal structure sa ila barangay nga naga pahibalo nga kinahanglan sila nga pang kakson.
Sa highway kadamo sang makit-an nga negosyo nga naga ukopar sang sidewalk.
May naghimo sang repair shop sang salakyan sa higad sang dalan. May naga display sang mga bayo. May naga baligya sang mga kahoy kag may yara man sang mga tricycle kag jeep nga nag himo sang mga paradahan.
Ini sila tanan ang madalasa sa nationwide clearing operation nga ipatigayon sumugod Lunes.
Sa Barangay 31 naman, ginpa aamat amatan na ni Punong Barangay German Bullolaza Jr. ang pagpahawan sa mga paradahan sang tricycle kag trisikad. Ang pagtinlo sa mga dalanon kag sidewalk antes pa man magsugod ang clearing operation.
Gin sapul na sang DILG ang tanan nga mga punong barangay kag opsiyal sang Bacolod para ipaathag sa ila nga kinahanglan nga makakas ang tanan nga mga illegal structures sa sulod sang sisenta dias.
Ini ang ika duha na nga bahin sang nationwide clearing operation, nauntat ang clearing operation sadto bangud sang pandemic.