Wala madayon ang pag-demolish sang mga baligyaan nga nahamtang sa palibot sang Bacolod City Government Office subong nga adlaw.
Ini bangud naghatag ang City Legal Office sang 10-day extension sa mga vendors samtang ginaplastar pa sang siudad ang posible nga lugar nga ila pagasaylohan.
Ginsiling ni Retired Colonel Levy Pangue, pamuno sang City Legal Office Enforcement team nga gindesisyonan kahapon sang siudad kaupod sang mga vendors nga papanaugan anay sa liwat sang final notice ang mga baligyaan.
Nagapadayon naman ang negosasyon sang siudad sa pamilya Gonzaga, nga amo ang nag donate sang duta nga ginatindugan sang BCGC, sa posible private lot nga saylohan sang mga stationary nga mga baligyaan lakip na ang mga relipan.
Dugang ni Pangue, nga kun tigayon na nga masaylo ang mga vendors, obligado sila nga magbayad sa amo nga private area.
Ginpabutyag naman sang mga vendors, nga 75 tubtob 100 pesos kada adlaw lamang ang masarangan nila nga mabayad sa arkila.
Obligado ang siudad nga kakason ang tanan nga business activities sa palibot sang BCGC bangud ini ang nakasulat sa ila nga deed of donation.*
[sibwp_form id=1]