Natalupangdan sa ginpatuman nga market inspection sang katapo sang Business Permits and Licensing Office kag City Legal Enforcement team sa Burgos Market nga 13 sa mga baligyaan nga iligal nga naga baligya sang butane ang wala man sang business permit.
Suno kay City Legal Officer Atty. Romeo Carlos Ting, Jr., pila man sa mga market vendors ang may utang pa nga renta sa siudad.
Wala pa man mabaton ni Ting ang rekomendasyon halin sa BPLO pero iya na ginpaandaman ang mga tag iya sang baligyaan nga mag renew ukon mag proseso na para sa ila mga permits antes pa man sang ipatuman nga closure order.
Magluwas sa pagabayaran nga multa sa kapaslawan nga mag secure sang business permit, pagamultahan man sang tig-P3,000 ang mga iligal nga nagabaligya sang refilled butane canister.
Sandig sa City Ordinance 885, ginadumili ang pagbaligya sang LPG refilled butane canisters bangud peligroso kag sarang ini makatuga sang sunog.