Mga balayran kag liquidation nagapabilin nga palaligban sang pila ka mga incoming barangay officials.
Nangin matawhay ang turn-over ceremony sa tunga ni elected Punong Barangay Johnny Esmil kag outgoing punong barangay Wenceslao Parlan sang Brgy 23 sang ini lang nga hapon.
Suno kay Parlan makabig niya nga all accounted ang mga pagkabutang sang barangay magluwas lang nga may pila ka equipment ang guba kag indi ma magamit.
Pero ang ginapaligban sang magabulos nga si Esmil amo ang nabilin niya balayran halin sa honararia sang barangay workers kag pati na bill sang kuryente ilabi na tinuig naman nga naga-attach lang ang barangay sa linya sang kuryente sang kaiping nga balay.
Kasubong sa Barangay 23, ginapaligban man ni elected Punong Barangay Ma. Febe Legaspi sang Barangay Handumanan ang liquidation sang pondo pati na ang pag hire sang dugang kuntani nga barangay workers ugaling asta karon wala siya sang nauyatan nga dokumento para mapat-ud ang financial status sang barangay.
Nagpanugyan naman ang Office of the City Accountant sa mga incoming barangay officials nga sarang na sila makakuha sang kopya sang bank statement sang barangay sa Landbank. Sarang man sila makapasaka sang reklamo angut sa mga missing nga mga government assets.