Local transmission sang COVID-19 sa Bacolod City ang nagapadayon apesar sang ginapatuman nga travel moratorium sa Western Visayas.
Makit-an sa record sang Department of Health nga bisan pa may yara sang travel moratorium, padayon ang pagsaka sang local cases sang COVID-19 sa Bacolod City.
Kalabanan sa mga nagapositibo ang mga close contacts sang mga positive patients.
Suno kay Dr. Hector Gayares sang Bacolod Emergency Operations Center, ini ang nagapakita nga dapat mag doble sa paghalong ang publiko ilabi na sa pagwa sa ila panimalay bangud yara lang nagalibot sa komunidad ang virus.
Iya ginpahayag nga bisan wala na sang may nagasulod gikan sa gwa sang western visayas, mahimo sa gihapon nga maglapta ang virus kun indi maghalong ang publiko.
Nagapreparar na sa karon sang dugang nga isolation facilities ang Bacolod sa tunga sang pagsaka sang mga kaso.
Kaina sang aga may 150 ka mga folding beds nga natalana ibutang sa Handumanan Elementary School nga isa karon ka bag-o nga isolation facility sang siudad.