Nakigbahin ang mga alkalde sa Negros Occidental sa ginpatigayon nga Memorandum of Agreement ukon MOA signing kaupod ang Department of Education para sa Nationwide Classroom Building Program sa Malacañang sini lamang nga hapon, Lunes, Pebrero 23.
Ginbaton ni Presidente Ferdinand Marcos Jr. ang nasambit nga MOA nga ginpirmahan sang DepEd kag mga alkalde sa pungsod.
Suno kay Marcos, pinaagi sa sini nga programa ginahatagan sang mas dako nga papel ang mga City government nga magpatindog sang mga proyekto kaangay sang classrooms.
Ang DepEd naman ang magatalana sang mga pagsulundan agud masiguro nga ang tagsa ka mga classroom ang mapag-on, safe kag nagasunod sa national standard.
Agud mapasiguro nga mapatuman ang proyekto, iga-release ang pondo sa tatlo ka tranche kon sa diin may obligasyon ang tagsa ka LGU nga mag submit sang bulanan kag quarterly report sa DepEd.
Ginpahayag pa ni Marcos nga sa idalum sang 2026 General Appropriation Act, masobra P85.39 billion ang gintalana sa basic educational facilities.
May 149 ka mga siudad sa bilog nga pungsod ang naglagda sang amo nga MOA sa DepEd.
Magluwas sa mga alkalde nagtambong man ang pila ka mga estudyante gikan sa nagkalain-lain nga buluthuan.*
[sibwp_form id=1]