Mga 325,000 ka estudyante sa idalom sang Negros Occidental DepEd Division ang gina paabot maga balik eskwela sa Lunes nga adlaw.
Deployment sang PNP plastado naman sa pag pasiguro sang matawhay nga opening of classes.
Padayon pa karon ang isa ka semana nga Brigada Eskwela.
Ini ang kabahin sang pagpanghanda sang tagsa ka mga eskwelahan upod ang nagkalain-lain nga mga stakeholders para sa pagbukas sang klase nga maga sugod Hunyo 16.
Ang enrollment schedule nagsugod naman June 9 tubtob 13.
Suno kay Negros Occidental DepEd Division spokesperson, Ian Arnold Arnaez may 324,000 ka mga estudyante sa idalom sang Negros Occidental division sang school year 2024 tubtob 2025.
Mga 1,500 ka estudyante ang gina project nila nga maga dugang para sa bag-o naman nga school year.
Ang mga eskwelahan sa 19 ka mga banwa sa probinsya kag sa Talisay City ang sakop sang Negros Occidental DepEd Division.
“Ang pinaka official nga enrolment period is June 9 to June 13. Official enrolment, dira kita mag kwa sang data para sa planning sang DepEd. Last year ang aton enrolment ara sa 324,000 ang expected naton subong may increase kita nga mga 1,500. projection lang na sang aton nga planning officer”, suno kay Arnaez.
Naga pahanumdom si Arnaez sa mga ginikanan nga mag comply sa mga requirements sang kabataan labi na ang bahin sa birth certificate. Labing importante ang compliance kay ini ang maga apekto sa records sang kabataan kun indi magsalalanto ang datus sa official record.
Sa pihak nga bahin may masobra sa 1,100 ka mga pulis ang iga deploy sang Negros Occidental PNP sa pag pasiguro nga mangin masulhay ang pagbukas sang klase.
Suno kay NOCPPO Director, Col Rainerio de Chavez, plastado na ang deployment nila sa mga eskwelahan.