Municipal Disaster Risk Reduction Office sang banwa sang San Enrique ang nag-recommend na sang deklarasyon sang state of calamity para sa banwa.
Suno kay Mayor Jilson Tubillara, napulo ukon ang kabilugan nga mga barangay sang banwa ang apektado sang tuman nga kainiton. Ang kahalitan sa agrikultura nagdangat na sa 9,951,589.70. Ini ang nagalakip sang kahalitan sa humayan kag tubo nga yara sa 7,458,547.70 kag fisheries nga yara sa 2,493,042.00 pesos.
Suno kay Tubillara, sa Lunes natalana ang special session sang konseho para mag concur sang rekomendasyon sang MDRRMC sa pag paidalom sa banwa sa state of calamity. Sa amo nga pamaagi makagamit sila sang pondo para man mabuligan ang sa karon 6,000 ka mga pamilya nga apektado sang sitwasyon labi na ang ila nga palangabuhian. Padayon ang water rationing sa mga barangay nga ang tubig nag ninit na. Ang Brgy Tibsok suno sa alkalde wala sang tubig. Ang mga punong gani nila halos wala naman sang tubig. Wala labot sini may mga pumuluyo pa gid nga apektado ang ikaayong lawas sang masakit kasubong sang ubo kag hypertension. Nalakip sa ila nga resolution suno sa alkalde ang paghinyo sa Department of Agriculture nga mag patuman sang cloudseeding agudto ma alibyuhan man ang sitwasyon sang mga pananom. Nakahatag sang food packs ang banwa sa mga apektado.
“Ang amon mga uma indi na kami ka crop kay indi na kasarang ang mga pumping. Hasta ang mga tubo diri namon nalaya na. Tapos ang amon fish pond indi ka crop kay gamay man ang tubig sang sea level. May tubig ang punong tuod pero nabaw lang. Dugay-dugay mahubas siya kay pwerte kadasig mag hubas ang init kag hangin. Dako ang losses namon sa rice, sa amon sugarcane, sa amon fish pond. Over all wala na mayo obro ang mga tawo kay wala na function ang mga uma ang mga punong. Bisan ang manug libod namon wala naman ka mayo i-libod nga isda”.