Shadow

Mayor Yulo: OCD dapat magklaro sang protocol bahin sa evacuation sang mga pumuluyo nga apektado sang Kanlaon

Luyag ni Bago City Mayor Nicholas Yulo nga pat-uron sang Office of the Civil Defense ang protocol bahin sa pag evacuate sang mga pumuluyo sakop sang danger zone.

Ini kasunod sang panawagan sang administrator sang OCD nga si Undersecretary Ariel Nepomuceno nga kun mahimo pabalikon nila ang mga evacuees nga ila gintugutan nga mag pauli.

461 ka pumuluyo sa Bago City sagwa sang 6km danger zone ang gin papauli sang nagligad nga semana kag 1,969 naman ka pumuluyo sa La Castellana ang ginpapauli.

Si Mayor Yulo kag Mayor Rhummyla Nicor Mangilimutan sang La Castellana ang naga panindugan nga ini sila ang indi na sakop sang 6km extended danger zone kag naga pabilin naman sa evacuation center ang sakop sang 6km danger zone santo sa protocol.

“I think they should clarify the policy in relation to evacuation, kay te may gina sunod pa ta nga guidelines nga within the 6 km radius. Now we’re confused what is the policy now”, suno kay Yulo. 

Paathag ni Provincial Administrator Rayfrando Diaz isa ka consultative meeting ang ginpatigayon antes pa man gindesisyunan sang duha ka mga LGU kag sang probinsya ini.

Dugang pa niya, ang mga natungdan ang una bes boluntaryo nga nag upod sa evacuation center bangud man sang epekto sang ash fall kag baho sang asupre sa ila nga mga lugar.

Ang OCD ang nag pagwa sang panawagan kasunod sang pagsaka naman sang activity sang bulkan Kanlaon.

Tuyo sang OCD nga wala sang may mapatay ukon zero casualties sa tunga sang gina atubang nga pag panghangkat dala sang bulkan Kanlaon.

Secured By miniOrangeSecured By miniOrange